Oté

« Avèye bien zanfan, avan li rouv son boush ou va konète son késtyon »

In kozman pou la rout

Témoignages.re / 15 zwin 2018

JPEG - 43.6 ko

Si ou i vèye bien out zanfan ou i pé konète son listoir dann détaye. Ou i pé konète kosa i kontant ali, kosa i malkontant ali, kosa i fé ont ali, kosa i rann ali fyèr épi lé z’ot santiman i travèrs son kèr momandoné. Donk, ou i pé konète késtyon li poz ali dann in réalité brilant avan li poz aou. I diré konmsi out léspri avèk son léspri i fé la rankont dann in momandoné l’émosyon lé for. Kozman-la sé in kozman l’Afrik é sak la di sa an promyé, moin lé sir sé in saz dann son péi. Pou kosa mi di sa ? Pars pou bien konète in moun, mèm in zanfan, i fo ou sé in saz. Si la pa in saz li gingn pa... Fé antansyon kant mèm, pars désèrtène foi ou i pé tronp shomin é lo késtyon ou i pans in zanfan i poz dann son tète avan poz dann son kozé sé pa li ki poz ali, sé ou k’i poz aou sa. Alé ! Mi kite azot rofléshi la dsi é ni artrouv pli d’van. Sipétadyé.