Oté

B.R : Kan mondializasion i arsanm bien kolonizasion !

Justin / 9 novanm 2007

Dopi inn-dé somèn, i parl déssi la bank la rénion : i prétan dir in bann vaza la sort la-ba dann la frans épi la vni issi soi dizan pou sokour so bank-la. Bann vaza i di konm sa : si i aplik pa zot tik-tak, lo bank lé fouti ! Alor, kossa zot i vé fèr : siprime bann sèrvis i okip ladministrasion lo bank, fé tout sa la-ba dan La Frans, lès arienk bann sèrvis komèrsial issi La Rénion. Donkalor, la BR sar pi in bank pou d’vré !
Sa téi doi arivé in n’afèr konmsa. Dopi lo zour la Caisse d’Épargne Provence-Côte d’Azur l’ashté la bank La Rénion, pa akoz lo nom lé zoli, pa akoz lo péi lé kalou, zis akoz i gingn in bon pé bénéfis. Souvien azot ! Sa lété in déga kolatéral Crédit Lyonnais sa !
Astèr, bann gran diréktèr i sort La Frans l’apré fé in manièr pou ral ankor plis la moné avèk zot la-ba. I fé arien si nana par-la in santène pèrsonèl i pèrd zot travay, sansa lé blizé égzil azot la-ba dan La Frans. Zot i koné koman i apèl sa dan la médsine ? i apèl sa “sangsues”. Dann film lorèr, i apèl sa vanpir. Sisèr d’sang ! Na dé foi, la mondializasion i arsanm bien la kolonizasion.

Justin