Konm mi di azot sa i ariv tazantan.

Dopi dé zour sé in kozman lo miniss lédikassyon nassyonal la fé mont la préssion. Par l’fète kossa miniss-la la di ? Dabor miniss-la i apèl Edouard Geffray é son lintervanssion téi porte dsi bann lang réjyonal dann l’amontraz l’édikassion nassyonal.

Kossa bononm-la la di ?

Li la di pou pass bak d’issi 2028 bann jenn lissé va gingn si zot i vé, pass in spéssyalité dann la lang réjyonal zot landroi : i parl pou lo breton, i parl galman pou l’occitan, mé i parl ossi pou nout kréol rényoné épi toute in kantité lang réjyonal i amontr lékol. Par l’fète néna par-la soissant-kinz lang réjyonal é in pé dan la bann i amontr dann bann zétablissman skolèr. Konbien an tou ? Mwin la tandi dir par Axel Gauvin, Prézidan lofis la lang, néna par-la in bone vintaine lang amontré épi i ansèrv pou amontr bann matyèr prinsspal..é sa i fé pa mal

Kossa i lé in spéssyalité ?

Sé in matyèr inportan i fé parti d’in légzamin i apèl bakaloréa. Spéssyalité sé bann matyèr konm listoir, la zéografi, syanss politik, litératir, filozofi, syans l’injényèr… antouléka sé in bann matyèr dann tan nou noré apèl bann matyèr prinssipal. Mé atanssion wi sava pa konpoz dann in lang réjyonal konmsa i fo ou la fé sa dann lissé o mwins pandan dezan. Dezan sa lé long avèk plizyèr z’èr par somenn.la pa bann matyèr lo ta, la pa bann matyèr tya-tya ou l’aprann an dézour mé in matyèr ou la aprann a-fon.

Bann sindikalist i di lé in pé tro bonèr pou fèr sa mé toulmoune in pé normal i konsidèr sé inn manyèr done la valèr bann lang réjyonal i fé parti lo patrimoine La franss… Donk, toussa dézord demoune i fé dann radio i ansèrv arien pars i fé pa avanss lé shoz é sanm pou mwin i fo konète sak i apèl légzistan é konète an koi sak lo miniss i prévoi pou lo bak 2028 i mète in pé pliss anlèr bann lang réjyonal é si sa i ansèrv vréman nout patrimoine.

Alor in pa an avan pou nout kréol ? A voir dann la pratik. La baz sé in bon lansègnman.

A bon antandèr salu.

Justin