Dopi inn-dé zour i koné bann rézilta lo bak é sak i pé dir sé ké lo réziltan dann l’akadémi (fasonn parlé) lé pa briyan ditou. Lé vré nora in sésyon ratrapaz mé si sa v’azout inndé grin anplis nora poin, d’apré sak i di, in gran boum an avan.
Astèr i pé rode lo pourkoi di koman, fé tourn la boul madam solèye dann in sans épi dann l’ot. Lir dann tout zafèr ou i pé lir d’dan mé sak lé sir sé ké pèrsone i trouv ar pa lo solisyon mirak pars na poin in bon dyagnostik : in maladi ou i koné pa, é ou i songn ali avèk médikaman non apropriyé. Rézilta ? Konm zot i koné.

Mé ni pé poz anou késtyon kant mèm :
Pou kosa Mayotte sé lo dèrnyé lakadémi (fasonn parlé), é La Rényon l’avan dèrnyé pou lo bann rézilta ? Pétète pars la kopyé dsi in sistèm édikatif fransé an rade par rapor sète bann péi l’OCDE. Tan k’a kopyé, akoz pa kopyé dso lo méyèr ? Plito ké kopyé dsi in mové.

Ni pé poz inndé késtyon i manj pa d’pain :
Pou kosa Mayotte na poin kalandriyé skolèr klimatik é pou kosa nou osi nou na poin kalandriyé solon nout sityasyon zéografik ? Pétète pars in gran kantité zamontrèr i sort La frans é i ariv isi konm laba dann z’ot shartèr san konète la sosyété, la kiltir, san konète la lang demoun i koz avèk in l’intégrasyon dirèk dann lo dis pour san d’moun lo pli friké.
Pou kosa nou néna in sistèm lédikasyon dopi soisann-dizan - é Mayotte dopi plizyèr dizène z’ané - ni ariv pa form nout pèrsonèl an kantité sifizant, Pou kosa Mayotte, son koté li gingn pa non pli. Pou kosa néna plis sète mil diplomé isi La rényon é na poin i parkour pou pèrmète azot form azot konm k’ i fo.
Alor kosa i pé fé mésyé l’minis ? Mète an plas in plan kantitatf. Akoz pa in plan kalitatif épi in bon l’adaptasyon : l’anfan, épi lo jenn lé pa fé pou lékol, sé lékol ki doizète fé pou zot.