Mi koné pa si zot i suiv bien l’aktyalité ; dépi in sèrtin tan, bann péi di dévlopé, konm z’Amérikin, Éropéin, i intérès pétrol péi le nor l’Afrik èk Moiyin-Orian.

Si zot i rapèl, dan lé z’ané 90, Bush la pans l’Irak lavé z’arm déstriksyon masiv ; i falé konbat Sadam Hussein ; la tié par dési tié, plis z’Arab irakyin ké z’Amérikin ; la pa giny nir a bout lo péi ; dousman dousman, bann z’Irakyin i ésay arlèv la tèt ; bann z’Amérikin té oblizé partir kom zot la kit lo Viètnam na karant sinkant an d’sa, na apé pré diz an, bann « zandarm lo monn » la parti l’Afganistan soi dizan po konbat djiadis ; anfin ta pré shas bann konplis Ben Laden, sak la konplot po fé tonm lé tour Manahatan le 11 sektanm 2001 ; mé obli pa l’Afganistan na osi pétrol, oui, kroi l’Érop lé an rès ? agard sak la spasé an Libi, na troi katr an d’sa, la pa la Frans èk Sarkozy la vouli ranvèrs lo sèf la-ba ? Koman té i apèl, lo kolonèl Khadafi, la giny siprim a li, son rézim diktatèr. Zot i kroi sé lo rézim politik la Libi solman, l’ONU ; l’Érop, la Frans, té i intérès à zot ? Non, zot té i vé mèt la min si bann rézèrv pétrol.

L’annui, lorsk ti fé soté in l’Éta konm la Libi, kan ti fourni z’arm bann robèl, ti kontrol pi ; lo bann z’arm i sava péi a koté ; donk i désan péi voizin ; la fine ariv Mali. Sak Sarkozy la komansé, Hollande oblizé kontinié… i finira pi so l’éskalad. Kan ou i artourn out rogar koté la Siri èk Bachar Al-Assad, koué la arivé ? La itiliz z’arm shimik, intèrdi par lé loi internasyonal la ger ; ki ? gouvèrnman ofisiel ou sinon sa robél ? Ti an sortira zamé !

Oté ! arèt ek tou sa la ; nou vé la pé dan nout rézion ! okip nout téritoire ! Balay dovan nout port ; zot i pans pa konm moin zot ?

Justin