Kosa zot i diré si ni koz in kou foutbal zordi ? Mi oi déza la tète inndé kamarad apré fé la grimas pars lé vré dann nout zoinal la zamé été in labitid parl éspor. Moin lé mèm sir an parmi nou néna désèrtin i pran léspor kaziman pou in l’opiom di pèp-Dann tan bann zanpérèr romin téi di pa : Kosa lo pèp i domann ? Lo répons lété : « lo pèp i domann arienk dopin épi lo bann zé d’sirk.. ».

Si mi vé anparl foutbol zordi sé pars, sanm pou moin, son laktyalité lé marké sé zour isi par kékshoz i rosanm in pé in éskandal. Ala l’afèr : Zot i koné lo zistoir d’balon an or ? Bann zinstans intèrnasyonal i sort donn lo balon an or, pou sak zot i kroi sé lo méyèr foutbolèr néna zordi dsi la tèr. Zot i koné sé Lionèl Messi la gagné épi li la gagn son sizyèm rékonpans. Rokordman pou zordi, mé néna poinn rézon pou k’sa i arète : pé sfèr li nora in sétyèm l’ané proshène, pé sfèr sé Ronaldo va gingn son sizyèm l’ané proshène. Pé sfèr osi sète istoir i arète mé nou va oir pli d’van. La fé tout in kanpagn dsi so zistoir d’balon an or. Momandoné, konm zot i koné, l’avé dsi la list bann prétandan in ga i apèl Sadio Mané, in gran zouar l’afrik é bonpé téi pans sé li k’i sava gagn son tour. Lo rézilta lé la : sé Messi la gagné, é Mané lété katriyèm solman. Inn lé blan, l’ot lé noir, inn lé arzantin l’ot lé sénégalé. Toulmoun i koné lé dé sé dé gran zouar foutbol mé akoz la pran inn épi la bord l’ot.

Pars l’ot an késtyon i zoué dann Liverpool i sort gingn in bonpé tit sète ané, mé in pé I di : vré pa vré, mi koné pa ! In l’afrikin i gingn ar pa zamé in tit konmsa pars in l’afrikin gran an parmi bann gran I pé pa zète lo pli gran - I pé pa z’ète lo méyèr an parmi bann méyèr. L’avé kant mèm in dézyèm plas pou doné afèr la mète ali katriyèm solman ? Fourmi i marsh dsou la tèr kréol i koné ! So kou isi pèrsone i koné pa. Lé vré lé dé, dann léspor profésyonèl, néna la fèss an or, konm i di mé lété in bon l’imaz pou l’afrik-L’afrik k’i mont zordi an parmi tout bann kontinan é l’afrik mi pans va fini par amontr kosa li vo pou vréman. Domaz pou l’afrik, domaz pou sak la désidé sirtou pars lonèr i tonm pad si zot : sa lé sir.

NB-Sak la koni amoin étan pti épi étan jenn demoun téi apèl amoin blan-fèrblan é sa téi fé rir in bonpé kan moin téi di La Rényon sé in bout l’afrik . Sa lété avan mé zordi ankor ni pé di « lo konplèks blan-fèrblan la ankor sévi ». Zot i pans pa ?