Mi pans moin la fine anparl provèrb-la. Pou sak i ansouvien zot i pé pran sa konm in rodifizyon. Pou sak i ansouvien pa zot i pé anrishi z’ot rofléksyon. I fo pa an avoir bak plis vinn-sink pou konprann sak i vé dir. Dabor sans prop : in match fotbal i dir 90 minit é shak lékip néna son shans : dé foi mèm lo pti i tap lo gro. Alor konm i di dann tribine : « Zoué balon ! ». Mé anplis ké sa, nout kozman néna in sans pli zénéral : i vé dir konmsa si ou lé angajé dann inn parti, sansa dann in konba, in konkour kékshoz, i fo ou i tienbo séktèr : si ou i gingn tan-myé, si ou i pèrd, pèrd avèk lé zonèr. Alé ! Mi kite azot rofléshi la dsi é ni artrouv pli d’van . Sipétadyé !