Sans prop : balyé nèv lé prop, donk li balyé prop. Si li la fine fatigué, li lès la salté trankil. Sans figiré : tazantan i fo shanj résponsab kisoi dann l’antropriz, kisoi dann la politik pars avèk lo tan i pran l’abitid, pétète mové l’abitid.

L’èrla konm di lo kont lo travay lé pa fé konm k’i fo-i lès la salté trankil. Lé konm pou médsin : gard aou lo mèm médsin pou in vi, ala momandoné li koné aou par kèr, touléka li kroi li koné aou par kèr é lé posib in foi li tronp, é si sé lo zour k’i fo pa tronpé ?… Astèr i di osi, i amontr pa vyé sinz pou fé la grimas : sa i vé dir, lé pli fasil roul in jenn dann la farine k’in vyé nana léspèryans.

Alor ? Alor i fo rokonète lé pa fasil donn son konfyans vi k’in jenn nana son l’ikonvényan é in vyé galman.