Mézami mi sorte fouye dan mo tète pou fé romonte par an dsi in kozman pou la route l’avé pran in pé l’fon-mi pé mè dir li lété pri sou lo fatra mon bande roflékssyon, é lo kozman sé sak mwin la marke an-o la.

La pa bézoin an avoir bak + 24 pou konprande in kozman konmsa pars ou, mwin l’ote, i pé fé la konparézon rante in vyé balyé épi in balyé nèv : vyé balyé kaziman li sali la plass, balyé nèv i fé plézir pars li done anou sak ni rode an baléyan, la propté... La pa bézoin in balyé d’franss, sansa in balyé d’chine pou fé plézir anou pars avèk toute zèrb épi toute bransh i pé fé bon balié.

Sa ni koné, mé sak i pé ète intéréssan sé anpliss lo sanss prope, lo sanss figuiré. Néna inn, sansa la poin ? Mi panss néna ; In légzanp : zélékssyon i ariv, é bande zéléktère i mète anlèr in mèr prop. Pou kossa ? Pars in mèr nouvo, i pé fé ali krédi pou in nouvo mandatire. Balié nèv, i balyé prop zot i panss pa ? A oir dsi la diré.

Alé ! mi kite azot rofléshi la dsi é ni artrouv pli d’van. Sipétadyé.