Mésyé, Médam, La sosyété, koz èk moin sé koz èk in kouyon, mé sé o pyé d’lo mir k’i oi lo mason. Kozman nou la mark zordi an-o la, sa in kozman kréol rényoné, in kroiyans néna an parmi lo moun. Konbienn moun té i di sa avan, konm pou di balèye pa mon pyé « sansa mi trouv ar pa pou maryé ». Sa sé in kozman ou i kroi, sansa ou i kroi pa, pars par l’fète néna poin l’obligasyon kroir ou pa kroir. Dzon, la poin la prèv in n’afèr konmsa ni dann l’éstatistik, ni dann l’éspérmantasyon. Sa i fé parti sak lontan nou téi apèl patoi kréol dizon in l’éksprésyon l’ariv konmsa dann la boush épi dann l’éspri d’moun é sé pa pou kosa é désèrtin la mète a kroir. Sanm pou moin sa lé osi valab ké « volkan bril boi vèr i bril pa boi sèk ! ». Alé ! Kroi si zot i vé, kroi pa si zot i vé pa, mé tansyon pangar kant mèm. Ni artrouv pli d’van, sipétadyé !