Mézami, zot i rapèl kroiyanss demoune l’avé dann in tan pa si loin ké sa. Demoune téi kroi si i balèye lo pyé kélk’in lé riskab lo kèlk’in-la i trouv ar pa a maryé.

Demoune téi kroi sa vréman d’apré zot ?

Mwin lé sir in pé téi kroi, in pé i kroi ankor, d’ote téi fé sanblan kroir, d’ote ankor i fé la forte tète konm pou dir zot lé pa la avèk sa. Mé o-fon mi panss noute toute néna toute sorte kalité kroiyanss : si ni kroi pa inn, ni kroi l’ote. Si ni kroi pa l’ote, lé sir nou lé pou tonb dann pyèz in n’ote ankor.

Nou l’imanité, nou lé konmsa.

Mi kite azot rofléshi la dsi é ni artrouv pli d’van. Sipétadyé.

Justin