Zot i koné d’moun koman i lé ! Souvan dé foi néna kalité kroiyans i tienbo pa d’bout. Dann kozman zordi ni anparl balyé. Zot i koné néna inn-dé kroiyans i sava avèk balyé konm par ébzanp si in moun i rèss lontan shé ou, ou i di marmaye mète balyé dobout déyèr la port. Si in moun i okup de shoz i rogard pa li, ou va dir ali, balyé dovan son port épi néna d’ot ni pé oir in zour-mé dann somi lo mo Daniel Honoré néna tousa. Donk moin la touzour antann dir : « Balyé pa mon pyé, ou va anpèsh amoin maryé ! ». Mi koné pa ousa sa sort, koman sa l’ariv dann nout lang mé zénérasyon apré zénérasyon patoi-la i pèrd pa. Défoi ou i pé antann : i diré mon fiy v’arèss vyé fiy, pétète inn la balyé son pyé. Ou i antann ankor : plito k’fé maryé aou avèk i n boug konmsa, moin noré myé fé balèye out pyé dann out zénèss. Mé sa lé riskab amenn anou loin é mi profèr invite azot pou rofléshi dsi lo maryaz, sansa dsi tout sak zot i vé. An atandan, ni artrouv pli d’van. Sipétadyé !