Mézami, zot i koné nou kréol ni kroi toutsorte de shoze. Souvan dé foi ni kroi la kouyonade. Antouléka kozman mwin la mark an-o la, sanm pou mwin, sé in vré kouyonade.

Mé antansyon in kozman konmsa si la pèrsone i kroi, i pé ariv a shoké – shoké dann sanss bataye. Lé bien vré ni kroi toute sort léspèss de shoz : marmaye piman la rante dann zyé, alé kashète sou la tab ! Mi doute pa sa néna in léfé plassébo, mé pou in léfé réèl, mwin néna konm in doute. Anbare pa la porte pars wa anpèsh mové léspri d’alé : zot i kroi sa zot ? Mwin mi doute. Si wi sava simétyère, rante par in baro, arsorte par in n’ote. Mi arète la, mé mi assir azot néna otan jenn jan épi jenn fiy la pa maryé kissoi in moune la balèye zot pyé, kissoi pèrsone la pa balèyé. Poitan mwin la pa in léspri for.

Alé ! Mi kite azot rofléshi la dsi é ni artrouv pli d’van. Sipétadyé.