Listoir moin la mark isi moin la lir sa dann zoinal. Sé listoir Bamba Mariam :

Kisa i lé Bamba Mariam ? Sa in jenn madam i sort dann in péi i apèl La kote d’Ivoire. El lé gol handball dan in lékip i apèl : « Elite Handball Club ». Mé sak i ariv aèl zordi, suivan sak moin la lir dann zoinal la pa ordinèr.

Konm èl néna in zanfan troizan, èl la déside alé travaye Koweit pars èl téi mazine fé son avnir laba. Mé oila, kan èl l’ariv dan lo péi, in gro madam koweit la anbosh aèl é konm i fé avèk tout bann travayèr étranjé la pran son papyé épi èl la rotrouv aèl apré fé ménaj dann in mézon, près san ropo, san somèye, pou in salèr la mizèr. El la konprann vitman èl téi sava sèrv zésklav dann péi-la é par la suite èl lété zésklav mèm.

Donk èl la sové mé dann péi koweit si in zésklav i sov la loi i rode ali, i trap ali, épi i karsèr la pèrsone. Aprésa, èl la pass tribinal é lo 19 moi d’juin l’ané 2019 èl té kondané a mor. El i doi z’ète lapidé : tyé kou d’galé si zot i vé konm dann tan l’ansien téstaman, konm koméla ankor dann désèrtin péi i mank azot in dégré d’sivilizasyon..

In moun sansé, in moun normal i pé dmandé koman in n’afèr konmsa lé ankor posib zordi, é li pé d’mann ali koman in péi roshèrché pou son komèrs i pé fé ankor in n’afèr konmsa. El i pé d’mandé koman bann péi rish di démokratik i pé aksèp fé komèrs avèk in péi tèlman pa frékantab konmsa.. Néna dé péi lé boykoté pou moin k’sa ! In krime konmsa i doi zète kalé é li pé z’ète si tout demoun normal i fé kékshoz.