Néna in nouvo Mèr laba dann la komine Sin-Dni dan La franss ébin télé la roganiz in lémission avèk li. Normal ! mé mi koné pa pou koué — mi dovine-la télé la fé koz in psikolog — lé assé rar kékshoz konmsa pou anparlé. Mwin la zamé antann dir kan bann gran shèf blan lé invité i fé vni in psikolog pou démaye zot pèrsonalité… Pars i fo ni koné lo mèr Baly Bakayoko lé né dan La franss d’in famiye téi sorte dan in péi i apèl Mali é li lé noir.

In kouyon i pé z’ète danzéré, é in psikolog galman pars lo boug la dégène sa syanss épi li la fé in gran détour par lorizine l’imanité épi li la anparl l’Homo Sapiens, épi lo bann gran sinz la komanss marsh doboute, néna pli lontan ké lontan, la parl lo shèf épi son gou pou komandé si tèlman ké linvité la vite sézi li l’avé tonm dann in konplo rassis-antouléka li la konprann lo télé noré pa koz konmsa avèk in shèf blan. Sa la rapèl ali toute bann méssaz rassis demoune la anvoye pou li dann la kanpagn zélékssion mèm si li la pass promyé tour é mèm apré pars sa i kontinyé…

Rassis ? Sa lé pini par la loi mé déssèrtin pèrsonaz piblik, déssèrtin média, l’apré rode banaliz l’afèr pou k’in zour tribinal i fini par obliye la loi épi son laplikassion… Astèr i fo mi anparl Mémona Hinterman : néna in lyssé Moufia i porte son nom pars èl lé sélèb dann son métyé gran reporter. Donk lo madam la vni dsi C New pou prézante son dèrnyé liv é alé savoir pou kossa èl la di « Si astèr i pé pi anparl l’homo sapiens pou in noir oussa i sava, mé lé ding ». Antouléka manyèr èl la mète son kiyèr sal dann marmite i kui pa pou èl la fé l’èr èl ossi èl i fé parti bann banlizatèr kozman rassis… é sak lé kont lo rassism la réaji é sa lé bien normal.

In romark : Kan wi sorte La Rényon sré normal évite ansèrv inn-dé mo, épi inn-dé zékspréssion. lésklavaz, langazism, lo kolonyalism lé ankor sho sou la sann é lo shabouk madam Desbassyns lé ankor kashyète par-la pou lo ka ou bann tan-la i rovien.

A bon antandèr salu !

Justin