Ni koné déza koman noute bande prodiktèr la vanille la fé gran-gran progré. Ni koné ossi lo kafé Bourbon pointu, inn an parmi lo kafé lo plu shèr néna dsu lo marshé mondyal. Ni koné lo thé blan, lo myèl vèr, noute léssans jarniome, zanana viktoria, mang grèff, létchi, longani. Ni oi souvan dann télé koman bande rényoné i progrèss. I paré koméla i gingn fé dovin la-ba Silaos, é la pi lo vin k’i rande fou astèr.

Na pwin lontan mwin la ékoute in kozman in spéssyalist do ri é li la done anou léspoir, in zour, nou nora in ri bon kalité issi shé nou. Lé vré demoune la di ali, i fo fèr antanssion pangar linportassion i ruine nout prodikssyon. Li la réponde, li la pa pèr d’sa pars lantiye néna partou déssèrtènn i vande bon marshé mé demoune i ashète lantiye Silaos i vande dizuite euro lo kilo… Néna inn, dann la sal la kass in pé ti-boi épi la di i fodré ni trouv in molékil mirakilèz dan noute ri é si té vré ?

Manzé la pa arienk manzé, sa ossi médalkaman é sa noute toute i koné.

Alon pa ziska la, mé i fo ni rokoné dsi lo poinnvizé la kalité nou néna — konm i di — in bon marj pou progréssé. Mé si dopi lontan l’avé pa mète kalpate pou anpèsh noute zénèss avanssé mi panss nou noré été pliss an avan pou noute zafèr.

Kèl lésson ni pé tire dann bande zafèr konmsa ? Sinploman ké si i anpèsh pa nou avanssé, avèk noute kapassité, épi noute tradissyon, nou va avanssé é pétète in zour bande servo rényoné va mète o poin toute in takon produi é avèk sa nou sar paré pou rivalize avèk lé moune déor san ké zot néna pou rovizite anou pars néna poin arien lé mové konmsa.

Mé i fo lité ! Pars san la lite, na poin pou avanssé.

Zot i koné talèr dann bande gran réstoran lo monde antyé va sèrv rougaye sossis épi d’ote pla mé lo vilin manyèr i vé ké déssèrtin i rovizite, é poitan san mantir nou la pa bézoin zot rovizitassion. Bande fézèr manzé bouyi, zamé d’la vi, i trape ar pa noute kizinyé manzé assézoné.

A bon antandèr, salu.

Justin