Kan l’ariv pou alé an mission dann Chagos gouvèrnman morisien la inform gouvèrnman bande zanglé pa pou domande la pèrmission mé sinploman par politèss pars malgré toute bande déssizion internassional - bande léktèr nout zoinal i koné – bande zanglé lé ankor dann Chagos é gouvèrnman anglé la réponde : mission Maurice i pé fé trankilmann sak èl néna pou fèr, él sar pa anpéshé.

Promyé parti la mission la bien éspassé : bande zoinalist internassional la anvoye zot zartik bande zoinal, bande syantifik la komanss zot mézir, gouvèrnman Maurice la iss son drapo nassional é bande chagossien la anbrass la tère, la komanss nétoiye la tonb zot zansète épi la amontre zot banyère azot.

Kan la prèss lo monde antyé la aprande sa par bande dépèsh, landomin, bande bato la guèr zanglé la komanss suiv lo bato syantifik, lo bato la pé é toudinkou bande zanglé sirman zot même épi bande zamérikin la koupe internet. Pi d’foto pou lo mond antyé ! Pi d’zartike par bande zoinalist ! Pi d’zimaz bande syantifik apré vizite bande réssif koralien ! Pi d’zartik dsi bande shagossien… Blakaoute zénéral.

Si tèlman ké bande shagossien épi la délégassion lété apré domandé si i sava pa koul lo bato. Mwin lé sir inn-dé fokon zanglé sansa zamérikin momandoné la kalkil de fé in mové sor avèk lo bato… apré nora di konmsa lo bato la fé in l’érèr d’navigassion é li mèm la foute ali dann in pompe é pou sa même li la fé nofraze... Konm l’aviyon la artrouv la zète dann fon la rivière du mat. Finalman la koupe linternet é la pa parti pli loin.

Mézami fère in n’afèr konmsa sa sé in akt la guère é la délégassion la bien vi sa konmsa. Sak i fé dir amwin bande zanglé lé vréman danzéré. Karéman in l’ènmi bète é méshan konm téi di dann tan. La lite la rante dann dir é la i koné pa riska oussa i sava.

Justin