Li avanss, li rokil, li rèst an plass ? Kèl l’avnir li rézèrv son bande zabitan ? Si nou lé dann in bon pass pou nou, in pass i amenn anou dann in myézète pou noute popilassion, sansa dann in movèz pass lé bon pou ral anou an aryèr ? Ala noute bande késtyon é mwin lé sirésèrtin in pé i poz azot késtyon konmsa.

Toulmoune i doi, sansa i pé poz ali bann késtyon-la. Pèrsone lé diskalifyé pou poz ali késtyon konmsa mèm si nou na poin noute toute lo mèm konpétanss, lo mèm kalifikassyon, mé sa i vé pa dir nou lé diskalifyé pou poz anou késtyon konmsa.

Astèr pou kossa mwin pèrsonèl mi poz amwin késtyon konmsa ? Mon réponss lé sinp pars dann mon majinassyon mi éspèr oir mon péi anlèr, é touzour in pé plisss anlèr... Mwin la fine di é pa arienk in foi, dann mon majinassion, mi oi mon péi konm in péi dévlopé. Dévlopé ? Sa i doi dir azot kékshoz sirman. In péi dévlopé ? Zot ossi zot i doi an avoir sa dann in pti koin zot koko d’tète.

Pou d’ote la késtyon i poz pa konmsa. La késtyon i poz par konparézon dann nout l’anvironeman. konparé lé plizanpli intérèssan : konpar la Rényon, avèk Maurice ; konpar La Rényon avèk Madagaskar, La Rényon avèk bande péi l’Afrik de l’est épi d’ote ankor… Ni pé di, noute statu i done anou déssèrtin zavantaz mé nou lé a d’mandé si ofiramézir noute éstatu i risk pa d’ète in boulé sanm noute pyé pou nou plito k’in avantaz.

Mézami sak mi di azot sé ké ni doi poz anou késtyon dsi noute l’avnir, dsi l’avnir noute famiye, noute l’antropriz, nout shantyé, é final de konte dsi noute péi épi son bande zabitan. Lé normal ni poz anou késstyon, lé lézitime ni poz anou késtyon konm sa.

A bon antandèr salu.

Justin