Fitintan péshèr tramaye téi trap poisson kisoi dann brizan, kisoi dann bordmèr normal. An touléka l’avé sèrtin poisson d’sézon é banna téi priv pa zot pou rafal par dizène épi dizène kilo. L’avé lo tan kapisin, lo tan pèsh kaval, lo tan sardine, épi lo tan téi bate dolo pou trap poissonn’résif mélanz-mélanzé… Kan téi trap in bon pé poisson bann ti kolon téi gingn in kari par raport lo pri lété ba é téi mnk pa. Mé antansyon dsi la késtyonn pèsh-kaval néna pèsh-kaval é pèsh-kaval. Mi vé dir : pèsh-kaval épi banklosh. Pèsh kaval l’avé é néna ankor in bon répitasyon, mé sépa pou kosa in pé i yèm pa banklosh. Moin pèrsonèl banklosh i nyabou fé plézir mon boush-pétète mon palé la pa tro fin. An touléka kan bann momon téi di zot zanfan : « Alé pran pèsh-kaval, la monté li la ! Sirtou pran pa banklosh. Out papa i yèm pa sa ! ». Alé ! nou va arpran la suite samdi-nou lé pa o pyès.