Oté

Bann APE : Konm in zoizo i kashyète son tète dann trou d’rosh !

Justin / 22 novanm 2007

Nana lontan, nout zournal i di i fo fé antansion akoz la mondializasion i fé son shomin faisant, épi, tardra-viendra, va toush anou galman. Nana lontan ni di : antansion, la pou arnégosié bann z’akor Lomé, épi bann marshandiz lé riskab sort dann bann péi-la, épi kalbite nout prodiksion.

Pandan tousa l’tan, bann gran zournal la pa la èk sa. Nana si tèlman d’ot shoz pou anparlé : starakadémi, zéléksion miss, la propagann pou Sarkozy, kraz-kraz in pé parti kominis, épi bann vol, épi bann krime, bann laksidan loto. Sirtou, parl pa bann problèm konm les APE, sansa inn foi rant-rant, épi kan lé fasil akiz prézidan la rézion.

Moin, pèrsonèl, mi anpans banna i s’anfou lo problèm nout péi épi nout rézion. Zot i vé pa annuir lopignon èksa. Fransh vérité, koué d’mié k’in gayar kriz ékonomik pou bien vann zournal ? Konmkidiré, in siklone lé pa intéréssan si li kass li briz pa ! Li ansèrv de rien !

Si li kass, li briz, sar touzour tan akiz la météo : li mèm lotèr si siklone l’arivé. Pandan s’tan-la, alon fé konm l’autruche : dann danzé, bour nout tète dann trou galé. Tanpir si bann prédatèr i manz nout déyèr !

Justin