Zot i koné kan vakanss i tarde pa arivé, l’anvi travaye téi fane in pé, pé s’fèr sé akoz la shalèr, pé s’fèr par kékshoz ni pé apèl in signal épi téi di anou : « Ou la p’assé travye ou-la ! Wi oi pa grann vakanss i ariv ? »… Par l’fète dahnn tan-la flanboiyan ti flér komansman déssanm é troi somenn apré nou lété an vakanss.

Mé koméla flanboiyan i fléri bonèr : kan i atak moi ‘oktob li fléri. Mé vakanss lé ankor loin, é bann proféssèr néna ankor in bon boute program pou fé é sak lé dir la plipar d’tan. Lé vré i fé sho é plizanpliss é bann marmaye lé fatigué, mèm épuizé, mé i fo travaye dir é toulézour Bondyé i done.

A ! In n’ote afèr : avansa flanboiyan téi fléri in foi dan l’ané é koméla zot i kass pa la tète pou fléri dë foi : lé pa rar zot i romète in kou d’kolyé dann d’mars si tèlman, d’apré mwin noute lorloz biolozik lé in pé détraké : ni koné k’marmaye i doi travaye pou avanss dann program mé lénèrzi lé pa o randé-vou, é lo program lé dir pou avalé.

Donk mi poz amwin la késtyon : si ni pé pi suiv flèr flanboiyan, kossa ni doi suiv ? Dsi kossa noute lorloz biolozik i pé apuiye ali pou ète in pé dann l’orloz lo tan… Mi domande amwin mèm si i fo ranplass lo flanboiyan par in ote flèr.

Poitan ranplass ali lé konm in krime. Zénérassion an zénérassion, nou la touzour baz ladsi é ni oi k’lé pi possib… Kossa i fo fèr astèr, Mi koné pa, é bann marmaye ossi i koné pa, mélé sir i fo fé kékshoz.

A bon antandèr salu !

Justin