Té i doi fé in dizène do zour ékstra. L’avé fé tout pou réisi in gran fète l’amityé, in gran fète l’éspor, in gran fète la zénès. Mi koné nana dmoun i travay la dsi dopi in bon pé d’tan. Mi koné in pé la pa ménaz z’ot tan, z’ot fors pou réisi so fète l’amityé. In kantité d’moun lété invité pou vnir isi pou ète an parmi. La prèss internasyonal l’été informé. Donk tout té paré pou k’lo fète i réisi.

Solman oila, in pti grinn sab i pé kal in mashine. La prèv ? Na in késtyon la poz an dèrnyé pars té i doi pa ète in késtyon tro inportant ; sé la késtyonn viza. Viza ? Oui pars si nou ni sava dann péi lé z’ot san fé tro d’formalité, désèrtin z’ot i pé pa rant shé nous san an avoir in viza é la batay i komans. In bonpé malgash, in bonpé komor lé té pa lo bien véni é la bien fé santir azot. Pou kosa ? Pèrsone i koné pa ! Pèrsone la pa pran son résponsabilité non pli ! in késtyonn détay pou zot ?

Pa sir ! Pars in ta z’afèr la grèf inn avèk l’ot pou, ziska ké lo délégasyon péi komor i désid arète avèk sa. Moin mi pans in pé la désid sabote lo z’afèr é zot la gingn fé. Pli pir, sanm pou moin lo konplotèr lé pa tro loin lo gouvèrnman fransé : kisoi lo l’éta lokal, kisoi lo l’éta santral. Lo mèr Sind-ni la pa di : « Gouvèrnman na ka répar déga li la fé ! »... Sé pa moin k’i di, sé lo mèr sind-ni in shèf bann sosyalis é in moun plito koté gouvèrnman. Mi vann konm moin l’ashté !
Moin sar pa pli long é m’a azout arienk in n’afèr : zot i koné kosa i apèl in gatèr d’sos, sansa in gatèr ? Mi pans l’avé dan sèt afèr.