Partou dann boit-a-lèt nana bèl-bèl lanvlop : nana foto dëssï, nana in papyé plï pti dëdan avèk in nom dmoun, nana papyé lé marké depï an-o jiska an ba. Kosa i lé sa ? Doi-z’èt papyé pou zéléksion. Bann foto-la, na in pë dmoun lé fringan dessï, nana in pë ou an apèrsoi la éfas bann rid angro-angro. Pti papyé-la i apèl bïltin !

Koman-koman, m’a trouv in manyèr pou konèt bïltin kisa i lé. Ben sa tout papyé lé garni lékritïr dëpï anlèr-la jiska an ba-la. A ! sa i apèl profésion d’foi ! Konm kan moin té sava katéshis alor ? Moin la konm in lanvi fou tousa dan la poubèl ! Solman mem si mi jèt ali, dann poubèl jone, lékritïr-la i éfas arpa tousèl épï déga sa la pou fé dann mon tèt ? I éfas arpa non plï ! Moin lé sïr dann fon poubèl, lï va louk amoin.
Kosa l’arivé, mon dyé ségnèr ?

An atandan, së salté d’papyé lé la dann mon min. Kosa mi fé ansanm ? A si marmayé té la pou moin kriy in pë apré zot. O kilé lë modi shien ? Si mi trouv pa lï pou donn ali in rès trankil, mon tèt va pété, va kass konm in koko dëvan la shapèl. Sépa si d’lo, sansa le san, sansa traka lékritïr va sort dann mon tèt ?
Bann i koné pa lir ? Anou mem kazimir ! Ben, i pans pa nou jamé don ?

Justin