Bann jenn i komans an avoir asé in trik konmsa Afors alé a lo....

Matante Zélida la ékrir Justin :
Mon shèr nové, mon spès salté,
Si mi konpran bien, koméla, bann jenn i prétan galman pran la plas diréktèr kisoi l’administrasyon, kisoi l’antropriz, kisoi l’izine. Zot i prétan zot nana lo diplome k’i fo, léspéryans nésésèr, la kapasité k’i konvien pou dirijé. Zot i prétan zot lé méyèr, touléka zot lé égal sak i sort déor, la fine bourlingué, nana bon-bon léspéryans. Domaj lé pa konmsa ! Domaj lo diplome sé pa toute é i fo ossi léspéryans. Bann jenn Rényoné i pans an réstan dann la jip momon zot va vnyabou ète kalifyé. Avan ète diréktèr, akoz zot i komans pa par ète manèv, ou sinonsa anploiyé ? I fo komans an ba pou ariv an-o. Vi koné, moin lé sir, bann rouj-de-fon, i done mové konsèy é lo konséyèr la pa lo péyèr, konm lo patoi i di.Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi pans ou lé fine alé lil Moris, mi pans ou lé fine alé rann vizit nout bann kouzin, sépa si ou la romark in n’afèr ? Bann Moris la-ba, i okipe tout bann post travay, kisoi an-ba kisoi an-o dann la sosyété... dann bann sèrvis piblik konm dann bann lantropriz privé. Zot i diriz la bank, l’otèl, konpagni l’aviyon, sèrvis dolo, la foré, transpor épi lo rèst.
Issi la pa konmsa ! Kan i fé in l’émisyon dann télé, san pran prékosyon, i koz èk lo patron ? Li sort pa issi. I koz èk lo diréktèr ? Li sort pa shé nou. I koz èk bann gran shèf l’administrasyon ? Parèy.
Di amoin, ou mèm, si nou Rényoné nou lé pa kapab okip bann post-la ! Di amoin si nou lé né taré, épi si nou va rès taré. La prèv ké non, sé k’in bonpé Rényoné nana diplome, zot lé an kapasité okip bann post inportan, mé gouvèrnman i pans pa zot ! Kapitalis i pans pa zot ! Nou na poin léspéryans. Mé léspèryans sa i gingn déssi lo ta. Si ou la poin lokazyon gingn léspéryans-la va touzour di aou, ou la poin léspéryans. Arzout èk sa kan in prézidan, moi d’novanm 2009 i fé promès, aprésa li tyinbo pa. I fo konprann bann jenn, i komans an avoir asé in trik konmsa. Afors alé a-lo, kalbas i kass.

NB : l’avé inn foi, l’opital i rode in l’injényèr dann léstrésité. Na in kandida Rényoné mé i pran pa li. Pou koué d’apré zot ? Pars li lé tro kalifyé pou lo post. Sa sé la pir vérité, pa in l’invansyon.

Justin