Mézami, mi panss zot i kroi mwin l’apré farssé mwin-la.Poitan mwin lé sèryé é mèm si mi plézante, mi plézante sèryèzman.

Pou kossa mi di sa ?

Pars lékonomi konm zot i koné sa lé mondyalizé é konm li lé mondyalizé néna sak i pans tout marshandiz i doizète protézé é néna sak i panss i fo li lé lib a la vante sof si ou néna in brové dossi.

A sipozé dann mon zardin néné pyé zèrbaz pou fé la tizane é an parmi so bann zèrbaz néna in zèrb i pèrmète vanj kont la kovid. Trakass pa, mwin na poin ! antouléka pèrsone la pankor trouv sa pou vréman !Mwin k’lé kouyon konm la line do mars lé ron, mi dépoz pa brové, mi kontante amwin fé mon tizane trankilman é pétète donn sa inn-dé kamarade épi domande azot alé paf é moung amwin par lo préfé sansa madam la Doussette.

Ariv in lobby kapitalis internassyonal, k’i domann li ossi la tizane é a sipozé ké tizane-la i fé d’bien, mi donn in bransh. Mé son mové lintanssyon i arète pa la : li anvoye sa dann laboratoir, li fé son zéssé, épizapré li dépoze son brové.

Aprésa mi oi li tré bien apré vande sa dann lo mond antyé épi…anvoye zandarm pou fé amwin in prossé an kontrofasson.Obliz amwin arash mon bande pyé tizane , sansa plante mon tizane an maronaze.I pé fé sa ! Mé kissa i sa gingn larzan a gogo, kissa i sava fé fortine,La pa mwin, la pa bibi.Sé lo lobby kapitalist.

Sé pou sa mi di azot, talère bande kapitalist lé riskab pran in brové dsi la glass bande zéskimo pou arvande lo zafèr banna. Mi kite azot roflési la dsi é ni rotrou pli d’van.