Dann in bon pé péi, demoun i soufèr la faim. I soufèr si tèlman k’zot i dsann dann shomin pou kassé brizé. Kossa i fé ? I anvoy larmé avèk la polis pou karsèr azot, é konm d’apré sak mi oi, bann gouvèrnman nana ankor lo moiyin bien nouri z’ot polis, bann sak la faim i gingn lo kou, é pa pou zoué ankor !

Sa i anpèsh pa lerop kontinié son politik pou dévlop bann karbiran agrikol : zot nana tèt dir, épi zot l’apré kalkilé dann kèk z’ané zot va tash moiyin mète ziska dis pou san so karbiran-la dann bak loto. Soman, antansion, zot i prétan dir, firamézir, bann karbiran dézièm zénérasion va ranplas sète promié zénérasion : sa bann karbiran va fé avèk tout réstan, kisoi réstan la paye, réstan lo grin, réstan do boi, étsétéra la ké lo ra.

Dizon, mé akoz la pa fé in bon léfor ziska koméla pou fé avans so bann karbiran dézièm zénérasion ? Akoz ? Lé sinp, lo kapitalism lé touzour parèy : gingn larzan vite. Tanpir si nana in pé i mor avèk la faim. Alé, méssié l’éstasion, ranpli mon bak ! La mi sava bouzé la ! Tanpir si in moun an plis i mor d’faim.

Konm di in bon kamarad : karbiran agrikol, koméla, sa in gob, é in vré gob ankor.

Justin