Matante zélida la ékri :
Mon shèr nové, moin la tandi konm in nouvèl, i di konmsa out tète la bloké... A s’ki prétan, ou i ème pa bann rish éstèr. Pou ma par, mi trouv sa la pa in manièr pou fèr : rish konm pov, demoun sé demoun. Épi la pa la fote bann rish si in pé i éné dann pétal roz épi i arèst arienk zépine pou lé z’ot... Vou nora bo bate vot tète kont in mir, i shanz ar pa arien... sof va fèr mal vot tète. Moin sré kotan i fé mal avou in bon kou, konmsa i tir toussa movèz idé vou nana dann koko.

Justin la réponn :
Mon shèr vié matante, mi rokoné bien out manièr rézoné, parlfète konm in tanbour. Si vou la pa bien tandi bann nouvèl, mi rapèl aou in richar, la-ba dan la Frans, la zistis i mète de boi avèk li akoz i di li la détourn larzan in sindika bann patron é pa par pti katsou siouplé, par valiz. Alors, pou bien romèrsié ali, lo sindika va donn ali in million édmi l’ero... kouék ou i vé : « Le zo i soutien la shèr »... Alors parl pa moin out zistoir bèrso an pétal roz épi bèrso an zépine pou bann moun siploman i vien rish akoz z’ot min lé long.

Justin