Oté

Bann lénèrji prop : Kan ni pans sa la doulèr i akab anou pars té nou té dovan. Pa lé z’ot !

Justin / 3 octob 2019

JPEG - 43.6 ko

Mé zami, mi koné pa tro lé z’ot koté, mé isi La Rényon, é pou d’moun konm moin, néna dés shoz, fransh vérité, i donn doulèr dann pyé d’kèr. Moin pèrsonèl, isi dann mon péi, sé kan l’moun lé pa rézonab.

Mi vé pa anparl bann ti-kolon, mé l’moun la parti dann bon lékol, la gingn bon-bon diplôme é ala k zot i viv konm de moun lé pa rézonab ditou. Lo bann mové zégzanp i mank pa é la plipar d’tan sé bann moun arivé dan la vi, sansa arivé dann la politik, i donn anou mové zégzanp-la… La pa ké zot lé pli bète ! la pa ké zot ignor tout zafèr ! Mé konm k’i diré, i mank azot in pé la matyèr griz, sansa zot i désid sèrv bann zintéré kashé, bann zintéré méskin, épi zot imarsh a la bagète bann fors okilt-néo kolonyal si zot i vé !

Mi sava pa anparl azot ankor in kou la rout an mèr kan zot la pa aksèp suiv la démarsh rézonab sète Paul Vergès, sète l’alyans épi sète parti kominis.zot i koné zordi dann kèl lanboulkidi sa la mète anou é koman ni sava sort ladan si la pa touni é oki. Mé mi vé parl azot lénèrzi :
Mi sort rogard in dokimantèr dsi lénèrzi prop dann l’Espagne ; lo péi i avans gran pa kisoi pou lénèrzi solèr, kisoi pou lénèrzi lo van, kisoi ankor pou lénèrzi i transform gaz karbonik an gaz épi an pétrol épi tout sort kalité lénèrzi ankor.. Alor figir azot lo fime i tèrmine dsi lil Herro i tard pa z’ète otonome dan lénèrzi prop é oila k’i poz lo zournalis in késtyon.

I domann ali : d’apré vou lil la sa i pé ansèrbv modèl d’ot zil d’ot péi é lo boug i réponnn : akoz pa fé sa La Rényon, sansa dan La Corse pars bann kondisyon lé parèye…… Doulèr i akab anou, nou rényoné, pars sé nou téi doi ansèrv modèl. Sé nou té an avans é lé zot la suiv anou épi la dépass anou par la fote bann pasèr d’kal la droit épi son bann konplisité d’gosh.