Na poin tro lontan ankor moin la antann dir, in vyé pèrsone kan sa I sava dann l’ot koté la vi, sé konm in bibliotèk I bril pars kan li sava li amen avèk li tout sort trézor la konésans. Domaz, mé lé konmsa. Si nou l’avé fé nout MCUR, é si shakinn rant nou l’avé in kazyé pou ansèrv magazin nout kiltir, sré pa pèrdu. Mé zot i koné la pa konmsa ditou !

Pou kosa mi di sa ? Pars souvan dé foi, kan mi rode lo pourkoi dann kèkshoz, mi di si mon papa lété ankor la, moin noré domann ali. Mé konm li lé pi la, lé posib mi konétra pa zamé. In l’égzanp ? Kan mi rakont azot zistoir Laramé é ké mi koné sa lété in lézann la spass laba dann péi l’érop, mi domann amoin kisa la rakont ali sa ? In vyé l’ansien sa lé sir mé kèl é koman lo vyé l’ansien la konète sa épi la konète rakont sa.

L’èrla, mi pans in vyé l’ansète téi sort La Frans sansa L’Erop la amenn sa dann son mémoir épi la rakont sa son zanfan épi zanfan la rakont lézann-la son zanfan insi s’suit ziska mon papa é li la rakont anou sa. Mi pans la kiltir popilèr té i transmète konmsa, dann tan l’avé poin You Tube, mèm l’avé poin liv sa lété marké d’dan. I fo dir dann tan-la l’avé poin la radyo, l’avé poin la télé, épi kan ou téi koné in n’afèr, sé pars in moun té i koné la rakont aou é ou la armasé. Anplis sa in manyèr transmète i bote amoin bien.

Zot va dir amoin, moin l’apré anparl bann lézann té i sort L’Erop é mi anparl pa bann lézann té i sort kisoi la Shine, kisoi L’Afrik, kisoi l’Inn épi in takon l’androi demoun La Rényon i sort. Mon répons lé sinp : mi pans bann désandan zésklav la ramas pou nou bann lézann bann péi z’ot bann zansète, mi pans galman bann désandan zangajé la ramass dann z’ot mémoir bann lézann zot vyé famiy l’amenn avèk zot. Final de kont, mi pans tout demoun la vni shé nou la amenn avèk zot z‘ot kiltir popilèr é zordi sa lé a nou.

Mi koné pa si zot lé dakor avèk moin : an kak non, fé konète amoin ! Ankak oui, fé konète amoin galman. Alé ! ni artrouv pli d’van.