Bann minis i vien épi i sava, i pass épi i arpass. I fo kroir zot la poin granshoz pou fèr la-ba dann Pari. Na inn la rèss douz èr issi, pou fé l’akèy promyé minis morisien — alé oir té pa bézoin a li ! — na in n’ot i vien pou dé zour. Pou fèr kosa ? Pars na sak i fé dann féklèr épi na sak i fé dann fénoir. Na sak i fé dovan toulmoun é na sak i fé solman an parmi lo bann konpars ;
Alor, zot vizite-la sa i ansèrv anou, sansa sa i désèrv anou ?
L’ané 2007, la fé in bon n’afèr kan promyé minis Villepin épi lo minis l’intéryèr, in sèrtin Sarkozy ! La nou la bien gagné : in tram-train épi in rout an kornish. Mé aprésa, kan la komans vnir san aré, sé l’èr nou la komans gingn lo kou. Nou la pèrde in tram-train, lé riskab ossi ni pèrde in rout litoral. Touléka, nou la ramas dis mil shomèr an plis.
Arzout èk sa in rol banna i zoué é ni oi pa tro klèr anndan, pars sa i fé an misouk, é a moins ké ou lé dann, konm i di, lo promyé ron bann dirizan. Ou i oi pa, mé firamézir, ou i oi pointe lo bout mizo. Ou i oi, l’apré ral déyèr késtyonn l’otonomi énèrzétik. Ou i oi galman, nout patrimoine indistriyèl i sava é bann sosyété kolonyal i kapar sa. L’izine kann li ! l’izine léstrisité sharbon-bagass li ! lotèl li ! Étsétéra, étsétéra ! Moin lé pa sir bann minis lé pou kékshoz la-dan, mé sak moin lé sir, zot la pa lèv lo doi pou k’i fé pa. Konm di mon dalon : « Bann minis-la, sa lé danjéré sa ! ».

Justin