Apré an avoir bien suiv lo tak-tik lo prézidan, mi kroi konète koman i gouvèrn in péi.

Dabor inn, i fo ou gingn fèr kroir : fèr kroir sé in métié, la pa ninport a kèl zoizo i niabou fé in nafèr konmsa. Donkalor, pou fé lo métié d’prézidan i fo ou nana in bon blag, in sipèr blag - sa lé oblizé, sansa ala in métié la pa fé pou ou.

Dézièm zafàr : dann bann problèm, nana in pé i trouv zot solision par-zot mèm. La pa bézoin kas la tète pou zot ? Zamé d’la vi, kontrèr ! I fo anfons bann port rouvèr. Sa lé pliské inportan. Si ou fé pa sa, domoun i kroi pi aou aprésa ; épi demoun lé kontan akoz zot i oi prézidan i pans konm zot.

Nana bann problèm na poin la solision komé-la : alors, i fo tras bann pèrspéktiv. I fo ou koz, ou koz é ou arkoz. Dizon la nou lé dann tak-tik « domin i raz gratuit ». In légzanp : travay plis pou gingn plis. Kissa la di sa i marsh pa ? Sèt-la lé dan lérèr. La prèv ? Agard salèr lo prézidan.

Épi, i fo bann zournal sak lé bien, bann télé épi bann gran radio i bat bien tanbour pou ou. Dizon, la-dan nana bann passèr d’lang an sifizans.

Justin