Mi konésé pa bann diréktèr bann gran sirfas té révolisionèr konm sa. Akoz mi di sa ? Pars kan mèm, na in zizman i défann azot rouvèr zot magazin apré inn èr, l’apré-midi zot la désid lès zot komèrs ziska név-èr é d’mi d’soir, yèr épi lo bann ouikènn i rès avan ariv la finision d’lané. Pir k’sa, zot lé ziska paré pou pèy in l’amann dé san mil éro. Koman i pé ésplik in n’afèr konm sa ?

Na in moun la vni koz dann télé épi li la di konm sa, li oi pa pou kosa li va rèst lo bra kroizé alé oir la konkirans l’apré travay. Mank do po ! La konkirans osi, d’apré sak moin la tandi dir, lé riskab ramas in l’amann. Donk, la pa la lo bon l’ésplikasion. Ousa i lé don ? In pé i di, bann gro patron l’apré sèy aplik lo fléksibilité dann travay. Donk, i bouloté kan nana boulo, épi kan na poin, bann travayèr i asiz in pé. Pou koué sré pa sa la loi d’travay ? Antansion pangar, sa in n’afèr lé riskab rotourn kont bann travayèr zot mèm ! Pars la fléksibilité, sé tié out kor kan na boulo, é kan na pi, pran médikaman pou guéri out boubou.

In pé travayèr i di, zot i sava gingn ziska sink san éro anplis pou so bann ouikènn, é sa lé bon pou zot port-moné, sa lé bon pou zot pouvoir d’asha. Akoz pa ? Si i roganiz la vi shèr, é si lo bann salèr i goumant pa an rézon, biensir bann travayèr va rézone konm sa. Pétèt san rann azot kont ké la pa so moi-la zot i fé in bon biznès, mé lé zot moi ké zot i fé lo mové biznès, avèk lo fèb salèr i done azot. In pé klian i di konm sa, vi k’zot lé pa lib pou alé fé zot kours kan zot i vé, sar bon pou zot alé dimansh apré-midi. Mi pans sa la pa in bon kalkil pars nar té préférab bann famiy i fé in méyèr planifikasion zot tan an déor d’travay ké zot i mord dsi zot tan lib — lo tan zot i gingn pas èk zot z’anfan.

I fo pa non pli ni obli, près trant pour san d’moun i travay pa é bann gran sirfas i abiz dsi zot avèk la shèrté d’la vi. Pou zot, mi oi pa kèl l’intéré zot i trouv la-dan. Sèl z’afèr pétèt va plime zot dé ka d’sou la prime Noèl, é zot va artrouv azot san rien pli vit k’i fo pou dir sa.

Justin