Mézami si mi di azot lésklavaz lé fini, pétète in pé va di oui, pétète in pé va di : moin néna konm dan lidé li lé ankor la. Lé vré néna pi lésklavaz avèk la trète isi La rényon, lé vré i viendré a lidé d’pèrsone domann k’i aplik lo kode noir. Lé vré ni viv dsou lo triptik libèrté, égalité, fratèrnité. Mèm si dé foi, kan ni lir laktyalité ni sirpran anou a kalkil kèl dogré libèrté nou néna, konm kèl dégré l’égalité, mèm kèl dogré d’fratèrnité.

Souvan défoi, mi di dann mon kèr, kan mon léspri i balad in pé dann nout prézan, konm dann nout pasé, kan par azar in lartik zoinal i pass dsou mon zyé mé sirtou nout pasé é pou moin-mi koné pa pou zot-nou sar pa lib, nou sar pa égal, ni konétra pa la fratèrnité toultan ké ni féra pa la limyèr dsi bann rokoin noir néna dann nout pasé.é néna, mi pé asir azot ! Zot i koné dayèr !

In pti légzanp ? Yèr, moin la lir in pti lartik dsi lo batkaré dann lilète a Giyome. Bat karé la dan ? Sa in n’afèr sa pars zot i koné landroi-la l’avé in bagn pou bann marmaye téi sava in pé an vagabondaz dann kartyé Sin-Dni. Lété pa zanfan bann blan, ni bann lib koulèr, mé lété zanfan bann dèrnyé marsh la sosyété.. Si zot i vé, zot i pé alé dsi l’internet pou rann azot kont par zot mèm.

Ziska zordi néna arienk bann shèrshèr i koné in pé sak la spassé mé lo gran piblik li koné pa. Si i anparl sa dann lékol maron, i anparl pa sa dann lékol La répiblik é oila pou kosa la plipar rant nou ni pass koté in kartyé d’vi bien noir nout pasé… Ni pé fé konmsi ni koné pa, mé nout pasé i larg pa nou fasilman. Li lé konm in monstré i tourn i rotourn dann nout pasé sète nout pèp é zamé li larg pa nou… Ni koné pa li ? I fé pa arien mé li lé la é lapa zordi li va larg anou. Bann klustèr nout pasé néna ankor lo tan pou tourn é rotourn anou.