Si tèlman partou zot i sava La Rényon zot i oi bann santral solèr. Partou ! La kaz demoune, parking bann gran komèrs… mé néna in landroi mi oi pa tro — pé s’fèr mwin la mal rogardé — dsi lo toi bann lékol mi oi pa tro é mi domann amwin pou kossa mi oi pa é mon konklizion sé ké néna poin bonpé lékol lé ékipé.

Zordi néna sindika amontrèr, néna paran, néna marmaye lékol, néna marmaye kolèj, marmaye lissé i soufèr la shalèr mèm zot i réklam la klim, brassèr d’èr, késtyon d’ète dann bon kondission pou bien travaye. Fitintan l’avé déssèrtin sindika konm déssèrtin paran téi réklam la klim mé la réponss dann tan-la té sinp : noute prodikssion lé pa sifizan.

Mé zot téi vé kant mèm lo mèm lané skolèr ké laba dann La franss pou pèrmète in minorité suiv lo mèm zétide ké laba é zot i rofiz lané skolèr klimatik poitan in fasson bien rassyonèl pou noute bann zanfan épi lo pèrsonèl travaye dann bon kondission, san tro soufèr la shalèr

Zordi mi panss avèk lo réshofman klimatik lé obligatoir fé l’ané skolèr klimatik é mèm i pé konbine sa avè l’èr kondissioné, é si i fo avèk lo rafréshisman par la mèr konm téi doi fèr épi la dégonflé pars noute mèr lé pa bon pou fé sa, losséan atalantik lé pli valab pétète… konm lé pli valab mète bann santral solèr dsi bann parking sipèrmarshé.

Mé pandann tan-la, konm i di kabri i manz salade… A bon antandèr salu !

Justin