Yèr matin, lindi, moin la parti la farmasi pou gingn inn-dé médikaman pars mon zo i fé mal in pé. Moin la anprofite pou d’mann lo farmasien si li l’avé mask pou vann. Farmasien-la la pète a rir. L’èrla moin la domann ali kosa mon domand l’avé l’èr bizar-étranj. La fé rir ali ankor plis.

Poitan l’avé poin arien pou étoné dann mon késtyon. Lé normal rode in produi ou i pé an avoir bézoin in somenn avan, pars dann in somenn sé lindi 11 moi d’mé é an prinsip i dékonfine. Donk ala in produi mi pé an avoir bézoin dizon si mi rant dann kar, dizon ankor pou ète poli par rapor in n’ot moun mi pé trouvé si li port in mask. Final dekont farmasien la di amoin li kont an avoir pou la finisyon la somenn. Moin la pa rode ki k’i pèrd ki k’i gingn é moin la dévir mon talon.

Mé dann mon do, moin la antann lo moun apré di avèk inpèrsone i travaye dann son farmasi : « I sar fé lo mèm zafèr avèk lo bann tèst : sa osi na poin lo nonm k’i fo ». Konfyans lé mor dsou pyé tamarin, sansa konfyans la tyé son mètr konm i di dann nout kréol rényoné.

Mé zami, kan moin téi travaye dann in gran lorganism sosyal, moin té i antann souvan mon bann dalon apré krétik lo bann gran dirijan é téi kriye azot bann planèr, bann planète pars zot lété in pé loin par raport lo térin. Mé dann sète afèr téi pé la plipar d’tan ratrap lo kou. Mé zordi nou lé dann in n’afèr grav i konsèrn plis soisant milyonn moun é si i loup. Si i loup ?

Ni pé dir sé in katastrof mé si so katastrof-la i rant dann in éstratézi pou par égzanp fé gingn larzan bann laboratoir-mi diré pa si sé in késtyon transform in pé la piramid dé zaz pars lintansyon sré kriminèl é i pé pa akiz bann dirijan koma, san prèv. Ankor ké moin la antann bann tète do zèf apré parl–mé sa té l’imour sa - rétabli lékilib la démografi.

Pou zordi m’a kontant amoin dir solman bann gran dirijan i plane : in bann planèr, in bann planète ziska prèv lo kontrèr.