Mé zami moin la fine anparl azot lo Klordécone (chloredécone) la mète sa laba dann bann péi zantiy, La Martinik épi la Guadloup pou tyé in spès bébète koko téi fatig bann plantasyon banane. Dann l’amérik l’arète sa l’ané 1976 é dann l’érop l’arète sa l’ané 1993 é i paré la kontinyé fane sa ankor in bon koup de tan dann bann péi antiyé.

Dopi tan-la bann produi-la la kontinyé anpoizone la tèr épi anpoizone demoun. In kantité d’moun i gingn kansèr la prostate si tèlman gouvèrnman-d’apré sak moin la antann dir la désid amenn son l’an kète pou konète déga la fé dsi la natir épi dsi l’moun.
Zistoman, so matin moin té apré ékout radyo frans-inter é moin la antann in n’afèr moin la tonm de o. Lété apré di rant katrovin épi katrovindis pour san la popilasyon la ramass lo kontaminasyon an atandan zot i déklar in kansèr la prostate sansa in n’ot maladi. Arzout èk sa l’anpoizoneman la tèr épi nou va konprann kèl dézast sa la fé laba.

Biensir si i di demoun é la tèr la gingn lo shok konmsa i fo anparl la réparasyon : kisa i répar, é par koman i répar épi répar kosa ? Kisa i pé répar mon santé ? Kisa i pé répar in tèr an poizoné ? Akoz la pa arète so l’anpoizoneman l’ané 1976 olèrk atann lo tan pasé.
Mé zami sa lé a suiv sa, sirtou par solidarité avèk nout bann frèr antiyé, é sirtou pars si lo mèm zafèr, avèk in n’ot produi-konm par égzanp lo gliphosate-i ariv anou, koman nou va débrouye nout kari pou amenn nou osi nout konba. Antan syon a l’èr, a la minit mi parl gliphosate i détrui li la, an silans mé li détrui kan mèm. Alor tasyon pangar ! Si lété apré anpoizone anou an silans ?