Souvan-défoi,mi antan in pé i di konm-dekoi, la santé la poin lo pri. Mé na sak i di, so kozman-la, i vo pa aryin pars la santé i koute larzan, é mèm i bon pé larzan... si tan tèlman k’in momandoné, in pé dmoun té i ézite avann fé songn azot.
Alors, kan Lionel Jospin la gouvèrn La frans, in sèrtin koup de tan, li la fé la Cmu, avèk in mityèl pou sak lé byin o-flan, mé lo plafon té si tèlman ba k’in bon pé dmoun lété blizé, si zot té i gingn, pèy in mityèl… mé in mityèl sa i koute larzan, la mète lo shèk santé an-plass. Koman-koman, demoun i gingn fé songn azot si lé nésésèr, mé la pa san difikilté.
Pa partou solman, pars na in pé d’plass médsin li, dantist li, éspésyalis li, i anvoy aou in n’ot koté si ou nana l’CMU. Mi sort lir, dann Paris, nana aproshan lo kar bann proféssyonèl-santé, i vé pa an avoir a-fèr avèk ou si ou lé dann in ka konmsa, pars lo ranbousman i sifi pa zot, i ariv pa lo otèr lo tarif zot i aplik, é i prétan zot lé dan z’ot droi ! Sa in drol zafèr, vik pou moin sé la sékirité sosyal épi la mityèl k’i gonf z’ot pla. Mèm si lo kliyan i pèy lo sirplis...
Touléka, sa i évite azot songn bann pov, pars bann pov-la, sa dèrnyé nasyon... i fo kroir !

Justin