Dé foi ou i antann in réfléksyon d’moun. L’èr-la, dann ou mèm, ou lé blizé poz aou késtyon. Ou lé a-domandé koman demoun i gingn di in n’afèr konmsa. Si ou lé méshan, ou lé riskab dir, karo la kouyonis i trouv pa lo boute. Pli sir, ou lé a-domandé koman in moun i pé di in n’afèr konmsa. Donkalor, dimansh matin, mi akout in kou radyo. In moun i domann in ransègnman. In drol ransègnman touléka ! Sa i port dési moush-a-myèl. Alor lo boug i rakont, dési son pyé mang, an flèr, nana in kantité moush-a-myèl, plis dé, san solon li, é li vé fé kour banna, pétète mèm tyé azot. Pou koué, d’apré zot ? Pars, sanm pou li, i fo li shoizi rant son mang é lo bann moush. Konm li préfèr son mang, li vé tyé lo bann moush. Li rode in moun pou done ali lo nom in médikaman, pars li la tupik son pyé d’boi, mé lo bann moush i s’anfoutsa. Sa i fé pa zot arien... lo dsi fèy sonz ! L’èr-la, in komansmann sobatkoz rant l’animatèr épi le loditèr. Lo lanimatèr i di ali akout lo radyo, sirman in z’oditèr va donn ali lo ransègnman li vé.

Alor, moin mi domann si lo boug i fé lo kouyon, sansa si li lé pou vréman, é mèm to pou lo l’animatèr. Pars, sof si mi tronp, si lo boug i vé mang, i fo moush a myèl i gonn son flèr. In sinp lozik, pou moin ! Mé lo ga, i diré, li pans moush a myèl lé riskab détrui son flèr, ou bien son mang. So kou isi, i fo amoin in lésplikasyon an plis. Pars si tout demoun i pans in n’afèr konmsa, bann z’abèy lé fouti ; sirtou ké koméla, in pé partou, zot lé an danzé : nana zot prédatèr natirèl, nana kalité produi i fasilite pa zot la vi, nana la natir i dégrade si tan tèlman ké défoi an inn nuite, toute bann travayèz i sava (i apèl sa l’éfondreman bann rush). Alor, si an plis ké zot problèm bann moush-a-myèl i fo zot i fé fas la kouyonis demoun… la moin lé sir zot poi lé o-fé... é nout poi galman, pars moush-a-myèl, sa i zoué in gran rol dann la vi dési la tèr.

NB : Pou arboukl lo boukl, lo l’aprémidi dimansh, in madam i apèl, pars son garson la trouv dann son zardin in sfinks tète dé mor. Sa in l’ènmi bann moush-a-myèl, i rant dann la rush pou manz lo myèl. Mé sète-la, konm bann guèp ou sinonsa bann frelon, é bann moush charbon, moush a myèl i trouv son boute, an antouran ali, an shofan ali, ziska ké li mor. Bann prédatèr natirèl ? Ok. Mé demoun kouyon ? Sète-la lé for.

Justin