Oté

Bann rass, sa i tienbo pa d’boute. In sèl : la rass imène !

Justin / 15 avril 2021

JPEG - 43.6 ko

Mézami, mi rapèl in zour nou l’avé fé in sorte pétisyon dsi linternète kont in proféssèr sanm pou nou l’avé krétik in fiye komor dsi son rass. Mi sava pa ardi son nom pars sa i komanss a daté, épi mi panss pa i fo rolève lo passé, sof si i fo vanz ankor in kou konte in latitide rassist.

Ala pou kossa mi di azot sa : Dann noute diskissyon néna in kamarade la di, solon li, an parlan d’limanité néna in sèl rass sé la rass imène - lo rèste, rass noir, rass jone, rass rouz, rass blan sa sé dé kouyonade-sa té ékri dann mon liv zéografi kan mwin lété an sizyème. Mi rapèl dann tan-la téi parl anou la fasson lo nélé tourné, l o shové si lé droite, si lé bouklé sansa krépu, la koulèr la po, la longuère, la kourbire lo rin étsétéri-étsétéra… Koméla i koné toussala i tienbo pa d’boute é sak n i koné sé ké toute demoun néna dsi la tèr i sorte in sèl plass dann l’afrik a popré dêsan, sansa trois an mil zané avan zézikri téi marsh kate patte.

Si noute toute néna mèm zansète, ébin noute toute lé frér épi sèr. Final de konte nout toute lé mèm rass : la rass imène konm mon kamarade téi di.. Ala pou kossa, mi diré néna poin pli bète ké d’ète rassist. Néna poin pli bète ké d’ète divizé dsi la késtyonn rass ; sa sé dé z’afèr k’i tienbo pa d’boute sansa sé dé shoz la pa vré é demoun la pran sa pou larzan kontan avan la syanss i fini par dékouv la vérité, mé néna bonpé d’moun la soufèr par sa.

Mi di « la », mi koze o passé, konmsi sa lété rézèrvépou lo passén ékoméla dann lo prézan, sa lé fini… Elass, troi foi élass lo rassism i fé ankor déga é la pa fini avèk sa. Lo vilin bébète lé ankor la é i fo atake ali san féblir, toultan avèk la mèm forss pars sa sé in n’afèr i fé anou d’tor, i fé anou d’mal, i ronz l’imanité konm in kansèr. Alé ! Ni artrouv.