Oté

Bann raté dann motèr listoir nout péi é koman sirmont tousala ?

Justin / 11 octob 2019

JPEG - 43.6 ko

Mé zami, mi koné pa zot, mé moin, moin néna konm difikilté pou bien konète listoir nout péi, listoir La Rényon… Mi antan déza dopi landroi mi lé, in pé apré souf dann mon trou d’zorèye : afèr konète Listoir La Rényon : afèr konète a-fon sak la éspass pou vréman dann in pti péi loséan indien dann troi syèk édmi d’tan-pétète inndé grin anplis mé pa plis…

Antansyon, mi vé pa konète ali konm in éspésyalis, dann détaye é tout pars mi vé pa vol la plas bann moun konm Sudèl Fuma épi d’ot, sak la pass in vi pou travaye dsi nout listoir. Mi vé konprann sinploman nout listoir épi ésplik lé shoz la spass é é koman zot la spassé. In késtyon moin la fine anparl isi mèm dann mon kronik « oté » épi port dsi in késtyonn ni pé apèl in bann dékalaz dann nout listoir.

Dékalaz pou l’abolisyon lésklavaz : pou kosa lété blijé aboli lésklavaz dé foi isi shé nou-1794 épi 1848- alé oir dann d’ot péi la aboli in sèl foi é lété fé… arzout èk sa la mète anou dann pyèz l’angazis é son bann konsékans pou nout pèp. Dékalaz pou trap l’égalité sosyal : pou kosa bann dépité l’asanblé konstituant la vote in loi -19 mars 1946-dsi légalité sosyal épi la mète in tan fou pou ariv ziska so l’égalité la. Dékalaz dann nout lite pou l’otonomi : pou kosa la lite pou l’otonomi la komans dann lé zané trant-mil ui san trant avèk lo mouvman frankréol - é la ropran dann l’ané 1959 é la pankor ariv o bout ziska zordi é nou la pankor trap nout dékolonizaz.

Ala pou kosa mi di, konm d’ot, myé konpran nout péi é son listoir ala kékshoz i pé pa fèr anou d’tor.O moins pou konprann lo bann raté dann motèr nout listoir épi pou trouv lo méyèr fason pou sirmont tousala.