In dalon i di a mwin konm sa “Sinkantan a monté, lé in laz krétik pou domoun èk travay, boudikont pou sak i travay, konm pou sak i travay pi par rapor shomaz“. Pou sak i travay pi, a laz la, arvwar pièr tak baro. Kisa i sar anbosh in moun sinkantan é kèk ? Souvan-dé-fwa lantropriz minm i déklar lo travayèr in pé éskinté pou dévir a li d’si l’asédik. Pou sak i travay ankor, fo trinn lo kor ziska swasant dé zan zordi, pétèt swasant sink domin, in pé i di minm ziska swasant sètan.

Lé vré pou vréman sinkant an in laz krétik. Kiswa, ou lé tro kabosé pou artrouv travay, kiswa ou lé tro zèn pou la rotrèt, konm mi di la bon o, plizanpli i ropous, i ropous laz minm. Konm travay lé rar konm korn lapin, domoun i ansort pi a zot, mi koné in dalon i dové alé a swasant an, i ral a li ziska swasant dézan é la zordi li apran i sar tir in boushé d’si son rotrèt konplémantèr, somanké minm li dwa mèt in tré dosi disi tan la, sinonsa li dwa travay pli lontan.

Pou anshévé gouvérman i raz la pint d’si lo p’ti moné rotrèt. Rotrèt zénéral, Konm rotrèt konplémantèr, boudikont i domann travay plis pou gingn mwin. Néna in boug in pé mantèr-mantèr la déza di a nou konm sa fo travay plis pou gingn plis, nou la zamé vi lo plis. Sédla i di a nou travay plis pou gingn mwin. Elas, i prétan bann sindika la donn lakor pou raz la pint. Bann sindika dovèr !