In rankont léspor, sa in lokazion éstra pou fé konète in péï, in pèp, in kiltir : agard Tour d’Frans ! Kan ou suiv ali dann Télé, ou apran dé shoz dsi la Frans. Lé ankor pli valab ké suiv lo kours par li-mèm. Ou oi bann péï plat, ou oi bann péÏ la montagn, bann bordmèr fantézi, bann flèv zoli vèy pa koman...

Madagascar, sa lé pli gran k’la Frans ankor, épi nana zafèr pou montré, zafèr pou oir, zafèr pou vizité. Lé ga ! La pa kan in siklone la fine kass tout zafèr i fo fé oir sak nana pi pou oir.

Alors, kissa lé asé for pou asplik amoin pou kossa la pa fé oir anou arien d’si Madagascar : ni son lékonomi, ni son kiltir, ni son bann péizaz, ni son bann tradision. Kossa ? Nou lé apré fé la guèr banna don ! Moin la pa antann di la guèr la déklaré. Akoz la pa fé inn-dé magazine, akoz la pa anvoy la-ba in moun konm Malet tèlman kapab fé rant demoun an konfidans avèk la natir ? Akoz ?
Biensir, si ni kont déssi in répons, nou va gard dann trou. Alor, kossa nout bann voizin va pans de nou : va di nou lé mové kèr, ni mépriz...
Oté ! Kossa i lé sa ? In lokazion manké, sansa in bann Télé s’an fout sa !

Justin