Mi koné pa si la fé in bilan. Mi koné pa si bann konklizyon lété favorab sansa lété pa. Antouléka, sète ané mwin la pa antann lo gran rabataz i fé shak ané sof a dir’pétète promyé foi, i fo fé vnir bann travayèr déor pou koup nout kann issi. Mi panss sé in foss bone solissyon ankor in kou é lé pa sa va sov nout prodikssyon kann issi shé nou..

Antouléka sanm pou mwin néna dmoune pou koup kann issi la Rényon provik lo travaye lé pa pli dir k’i fo, é provik bann koupèr i toush in salèr korèk ; mé pou bann koupèr an avoir in pèye normal i fo bann plantèr i gingn zot vi é lé pa lo ka aktyèlman.

Mwin la antann in sindikaliss parl la mékanizassion la koup mé sa i mérite in réflékssion… Mwin la fine oir bann koupèz mékanik dsi térin plate é dsi bann grann parssèl mé mwin la pankor vu bann koupèz artizanal épi adapté pou bann térin inpétorte-torte, in pé an pante, avèk bann oss-bèss anndan..

Mi rapèl dann tan Minatchy lété sindikalist plantèr l’avé parl d’in mashine invanté shé nou mé i paré la ziss invanté é pa réalizé.. Alor, sèryèzman mi panss pa i fo lanss bann zidé konmsa san monte in bon projé… Si na poin in bon projé, sèryé é tou ; si i mète pa lé moiyin, si na poin in volonté rényonèz, ébin talèr lé riskab sar blijé konzig la kane o passé.

A bon antandèr salu !

Justin