Na poin lontan, kan la ékrir dann Témoignages na in gran danzé i ménas kann par raport bann z’OGM, in léktèr la di li konpran pa pou kosa bann plantèr désèrtin péi l’ afrik, l’Inn épi d’ot landroi ankor lé bien kontan avèk z’ot somans koton Zé-èm. L’èr-la, li oi pa pou kosa bann plantèr kann i doi s’anpass in bon n’afèr konmsa… Lé vré OGm sa nana plizyèr prinsip mé lo pli prinsipal sé fé énète bann plant noré zamé aparète natirèlman.

OGM, na sak lé pour, na sak lé kont, nana sak lé sinploman méfyan é i domann aplik lo prinsip prékosyon… Dakor, mé na inn, mi domann amoin akoz i lès ali lo droi fane partou, sé bann l’ogm roundup ready. Pou kosa, mi di sa, pars li donn arienk lo droi pou sali la natir. Li fé bann varyété, koton, mayi, kann épi sa lé paré pou siport son tyèr d’ zerb « round up ». Donk, ou i fé bann plantasyon, apré sa ou i bonbard ali kout round up, kisoi kout l’aviyon, kisoi kout l’élé koptèr san triyé (la pa bézoin zèrbisid séléktif ! ) bonbard tout épi si nana in pé travayèr imigré dann karo, bonbard azot galman. Si i fé pa d’bien, i fér ar pa d’tor.

Solman oila, i ariv in zour, ou i tonm dsi in zèrb in pé pli fourné, ou i bonbard ali mé li kaptir out kapasité pou rézis bann z’inséktisid é li lé tèlman rézistèr, tèlman dir ké li okip tout lo plantasyon. L’èr-la, i fo arash avèk la min ? Non i fo armète in n’ot doz in n’ot dézèrban an priyan bondyé ké lo pli pir i ariv pa. Sa l’ariv, dann l’ ! amérik avèk l’amarante (mèm famiy ké la ké mimite, sak i fléri dann nout zardin) é mi pé dir azot bann plantèr i abandone an vitès zot somans ozm pou artonm dakor avèk zot somans dopi lontan..
Alors, kosa i fé avèk l’ozm mésyé monsanto ?, I lès so mal fondé kontinyé ? Sansa i fout ali in bon kalpyé, in kou d’rès trankil.

NB L’amarante, in mové zèrb ? Pa ditou, i fé bon salad ansanm, épi nana plizyèr syèk li lé la pou ranpli boujaron demoun. Arzout ankor tout son bone kalité. Si li gingn fé la guèr kont Monsanto, sé in kalité an plis.