Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, si mi konpran bien, pou zot bann rouj gouvèrnman La frans sé in gouvèrnman bann zinkapab. An touléka, zot i di pa, mé zot i lèss konprann, antro voir, rant lé lign. Si i kroi azot, tout zafèr noré marsh myé si bann rényoné l’avé la posibilité komand azot par zot mèm. Mi pans sé apopré sak zot i di vik dann tout zafèr zot i krétik gouvèrnman épi son bann roprézantan sir plas. Néna in problèm ladan sé ké bann rényoné i vé pa d’in gouvèrnans konmsa. Tok ! Pran sa pou toi !

Justin la fé pou répons :
Mon vyé matant k’i koz arienk la boush rouvèr, mi sézi bien sak ou i di, mé mi pans pa ou néna rézon pou toulbon. Pou kosa mi di sa ? Pars matant si ou i ékout sak lo moun i di dann radyo, si ou i lir sak in bonpé i mark dsi bann rézo sosyo, lé forsé ni rann anou kont bann rényoné i pass zot tan pou krétik la fason gouvèrnman i diriz lé shoz shé nou. In sinp légzanp bien dann l’aktyalité : ni rapèl kan désèrtin téi vé anpèsh bato voiyajèr akosté, téi vé mèm fèrm l’aéropor, té i krétik lo confineman shakinn dann son kaz kisa l’avé rézon ? Lé rényoné sansa bann tète zèf roprézantan lo gouvèrnman ? Sirman lo poinnvizé rényoné lété lo bon poinnvizé. Sa sé in légzanp é la pa lo sèl, pars néna in kantité sityasion konmsa k’i amontr bann zafèr rényonèz sar myé zéré sir plas par bann rényoné. Tok ! Pran sa pou ou !