Zot la vi sak moin la vi dann télé ? Non ? Zot lété apré rogard ankor “Marina” ? Domaz pou zot pars sansa, zot noré vi in n’afèr k’i vo la pènn !
A oui, mon bann dalon ! Figuir azot, méssié Bush (i ékri Bush, mé i pronons “boush”, konm la boush) l’apré bate son karé dann tout péi li la déklansh la guèr. Na inn-dé zour, li lété dann péi l’Irak. Li té apré rakont li lavé rézon anvahi lo péi, pou fé gingn la démokrasi, pou fé arèt sèk bann téroris, patati-patata, gasparin-briné, dé kanar pou in poul...
An parmi bann zournalis, nana inn sa la énèrv ali, sa la fé mont son gaz. Li la komans dispite, li la dmann lo prézidan si li lé kontan an avoir fé tié tousa bann moun l’Irak. Apré, son kolèr la monte in kran ; li la anvoy son bote dan la tète le boug. Oté Baya ! la pass pré ! la zis flouté ! Bann sékirité la karsèr ali, mé li la gingn lo tan trète lo boug de shien, "léspès shien !".
Lé vré, Bush lavé bézoin in moun té i jir ali. Pou tout déga li la fé, pou tout demoun lé mor par son fote, pou déga dann lékonomi, pou an avoir viol lé droi bann moun. Lé vré ! Sa lé bien vré ! Mé solman, trèt ali lo shien la pa bon sa ; Lo shien la pa parti fé la guèr partou ! Lo shien la pa viol lo droi bann zanimo ! Ek sa, li la pa parti vant ali plis k’i n’an fo. Alor, akoz maltrèt so pov shien-la ? Lo shien mérite pa in n’afèr konmsa ! Si moin lété BB, moin té i port plint. Sa lé sir !

Justin