Ala in drol nouvèl pou vréman ! In proféssèr médsine, in "cancérologue" i apèl Dominique Belpomme, la parti fé in mission la Martinik épi la Guadloup. Li la parti pou éssèy oir in pé koman bann péï-la lété polié, sansa lété pa, avèk toussa péstissid banna i ansèrv dann l’agrikiltir. É bin, kamarad ! lo rézilta la pa zoli-zoli.

Déga, oté ! La pa dsi bann poizon-la, bann plantèr la fé lékonomi : la fané, la fané, la fané ! In ta èk in paké... Alor zordi, bann produi-la i fé d’tor bann nap dolo sou la tèr, l’èr demoun i réspir ! Bann zanimo galman i soufèr. Nana in pé i rant avèk demoun épi i sava pi. Sa i donn azot kansèr an rafal : nana plisk’in bon pé nana kansèr la prostate.

Bann sèrvis médikal la-ba l’apré kalkilé si sé bann péstissid l’otèr toussala. Lé déza tan zot i komans poz azot késtion ! La pa bézoin atann tout démoun lé mortibis-krévatizès pou rodé !
Pou nout par, ni di l’ka bann zantiyé lé pa klèr ! Karéman z’ot kanar lé noir !
Oté, lé ga ! Bin lé n’ot, koman i lé ? Lé an douss ivrèss, pétète ! Asé fé lo koulou don ! Zantiyé lé anpèstissidé, é nou, é nou, é nou ?

Justin