Mi sort lir in nouvèl i di amoin késhoz bien. Sé koi ozis ? Sinploman ké Jéremy Morel in zouèr lékip Lyon-promyé divisyon dann La Frans - i anons li sava zoué pou la koup afrikène bann nasyon avèk lékip Madégaskar. Li di dann in dépèsh dsi l’internet, sé kékshoz i rann ali fyèr… Aparaman, li sar pa lo sèl pars an parmi bann foutbalèr i anons déza Zacharie Boucher in gol asé koté i pans li v’alé zoué avèk bann lékip Madégascar avèk anplis sink zouèr dézyèm, mèm promyé divizyon foutbal laba dann La Frans.

Mi pans in pé i pé dir koman in n’afèr konmsa lé posib ? Lé posib pars néna bonpé rényoné néna in gran-pèr, sansa i n gran-mèr né Madégaskar é d’apré la loi d’ lo péi zot i pé partisip la CAN (koup afrikène bann nasyon) avèk bann zouèr malgash. In fyèrté pou zot é an mèm tan lokazyon partisip bann gran match pars lo nivo football l’afrik sé in bon nivo. Jérémy Morel pou son par i di li lé kontan pars sé (okazyon pou li, l’ané 2019, pou partisip in tournoi valab késtyonn nivo).

Moin pèrsonèlman mi oi pa lé shoz konmsa san pour san. Mi lir sak bann zouèr i ékri é mi partaz z’ot poinn vizé, mé pa solman. Pou moin sé konm in vérou psykolozik k’i sote. Néna kèk tan, zamé bann rényoné n’ar parti zoué avèk bann malgash vi ké, nou téi pans, ni sort la kuis Zipitèr-té i di pa La Rényon koloni kolonizatris ?-Mé rozman in tan konmsa lé dépasé. Ni komans solman romarké nou néna in gran voizin-égal sirfas La Frans+sirfas la Beljik - é dann l’avnir sa i doi konté pou nou.

Pa solman pou l’éspor mé galman pou tout sak i fé lo ko-dévlopman rant in péi nout bann zansète konm Madégaskar épi nou mèm. Sa sé in gran zafèr pou nou ! Konm i di sa in shalanj épi shalanj-la i spass dann in kontèks gagnan-gagnan... Ala in réfléksyon dosi La CAN 2019 é pou moin sa in kékshoz bien inportan pou nou. Mi kite azot rofléshi la dsi é ni artrouv pli d’van. Sipétadyé !