Kossa lété pa prévi ? Lété pa prévi bann demoune dann nor, téi sar kapar bann prodikssion lo sid é poitan sé sak ni oi l’apré fé dsou noute zyé. Inn foi an pliss nou néna in kou d’rotar Pou kossa mi di sa ? Kan nou l’aprann bann prodiktèr shanpagn té apré ashète bann térin pliss o nor, nou téi kass pa la tète pou sa. Kan nou la antann laba dann la sardaigne l’érop té apré ède bann plantèr plante zanana nou la pa bouzé… Gouvèrnman La franss non pli.

Kan bann demoune dann kontour la méditérané la komanss plante zavoka nou la pa bouzé, gouvèrnman non pli. Kan la komanss plante la vaniye laba dann la Brotagn la fé dsi nou konm lo dsi fèye sonz. Sirésèrtin bann nordiste i vé pran noute prodikssion é anpliss zot néna lo moiyin sète l’érop é tarde pa l’érop i protèz banna kont noute lésportassion nou nou lé kapab arienk gingn kou d’frin pou lésportassion é pa konte l’anvayisman.

Mi rapèl in tan téi apèl zanbérik lo pti bèztamèr pars téi pran la plass noute lantiye in pé apré la guèr… Astèr kossa i fo ni fé ? Si ilèss La franss li done la min pou tyé noute prodikssion konm li la fé pou noute kann. Sépa si lo tan bèztamèr i sava pa rovnir ankor.

A bon antandèer salu !

Justin