Kan i di ponp, moin mi oi in ponp vélo. I tir, i pous, i tir, i pous ! Kan i tir li pran l’èr, kan i pous li rofoul l’èr dan la rou. Alor in zé d’ponp sé kan i lès aou kroir ou i sa pran favèr, épi apré i koins aou ankor plis.

Kansa i fé in zé d’ponp avèk in moun ? Kan i fé kroir ali li sar gingn satisfaksyon, é aprésa i donn pa li arien. Zéléksyon souvan i baz dsi in zé d’ponp : i promète aou kisoi in kaz, kisoi in travay, aprésa ou i antan pi parl de riyin. Na ankor in n’ot manyèr zoué la ponp avèk in moun : i anvoy ali dann in biro, aprésa i anvoy ali dann in n’ot, épi dann in troizyèm ziska ké lo boug i konprann pi arien.

Zoué la ponp ? Sé roul in moun dann a farine. Nou lé dann in sosyété ousa sa i anmank pa.